‘Entaun ita tenki lao ba oin hodi aprende buat nebee klean liu…….’ Ebreu 6:1

Espiritualmente, ita balun seidauk buras. Tuir lo-loos, imi sai ona mestri hodi hanorin ema seluk. Maibee buat baziku hosi Maromak nia liafuan mos, imi seidauk hatene, imi presiza nafatin ema seluk atu hanorin imi……Entaun ita tenki lao ba oin hodi aprende buat nebee klean liu. (Ebreu 5:12-6:1) Hanesan mos kresimentu fiziku, iha ne’eba iha karakteristika maturidade espiritual hanesan ida ne’ebe mensiona iha (1 Pedru 3:8):

1. ’Sai…….unidade iha espiritu.’ Agora, unidade ne’e la hanesan uniformidade, iha ne’ebe ema hotu tenke hanoin hanesan ka unanimidade ne’ebe ita hotu tenke konkorda buat hotu-hotu. Unidade ne’e konsentra liu ba iha saida mak kesi ita metin, duke koalia kona ba asuntu sira ne’ebe bele hafahe ita.

2. ‘Simpatia ba malu.’ Lian Gregu nia interpretasaun ba liafuan simpatia ne’e katak atu iha sentimentu ba ema seluk. Se iha ema ruma laran kontenti, kontenti hamutuk ho sira ba. I se iha ema ruma tanis tanba tristi, tanis hamutuk ho sira ba. (Roma 12:15) Bainhira ita komesa preokupa ho ema seluk duke ita nia an rasik, ita nia maturidade hahuu krese.

3. ‘Hadomi malu.’ Ita hotu presija kolega ne’ebe hadomi ita no suporta ita, ema ne’ebe fo nia tempu tomak ba ita.

4. ‘Iha kompaisaun.’ Iha tempu teknolojia ida agora ne’e fasil ba ita atu ignora ema sira ne’ebe iha presija. Bainhira Jesus haree ema barak nee, Nia hanoin loos sira, tanba sira la hatene atu halo oinsaa, i la iha ema ida atu tulun sira. Sira hanesan bibi malae nebee la iha bibi atan atu hatudu dalan ba sira. (Mateus 9:36) Ema nia situasaun susar book nia fuan, no ida ne’e tenke book ita nia fuan mos.

5. ‘Haraik an.’ Charles Swindoll hatete, ‘buka oportunidade atu fo…. hodi harii laos hamonu, atu serve laos atu hetan serve husi ema seluk, atu aprende husi ema seluk laos atu hadau malu kadeira hanorin. Entaun, oinsa ho ita nia situasaun durante ne’e? (AFS)

Aihan ba Klamar: Nehemia 8-10 >Joao 20:1-9 >Salmu 105:37-45 >Proverbiu 30:20-23