Maun alin sira, se ema sarani ida monu ona ba sala, entaun imi nebee ke moris tuir Espiritu Santu Nia hakarak, tenke ba koalia didiak ho nia hodi lori nia fila fali ba dalan nebe loos, maibe kuidadu imi nia aan, para labele monu tuir nia (Galatia 6:1)

Paulu hakerek hanesan nee “se karik ema ruma kaer kona monu iha sala ruma, ema nebe maka spiritual nebee ke diak bele hakbesik aan fo konselu ema nebee ke sala ho fo koragem ho fuan nebee ke maus”. Mai ita atensaun ho liafuan “KAER”. Barak husi ita hanoin katak ‘ida nee sei la akontese ba hau’. Maibe ida nee. Bainhira ita iha frakesa ita komesa monu ba sala no hahalok aat. Ida nee bainhira akontese karik ba ita nia povu iha konkregasaun ida nune ita nia responsabilidade maka ajuda sira sai husi hahalok pekadu ou sala. Iha Biblia iha liafuan hateten katak RESTAURASAUN liafuan ida nee ita rona hanesan lian kura ida.

Para hadia fali ema nee ninia spiritual ita tenke ajuda nia ho manaeira tuir mai nee:
Ita tenke ajuda sira, para sira komfesa sira nia failansu nebee ke sira halo. Belun doben sira Liurai David halo sala halo relasaun sala foer ho Batseba, nune David halo orasaun “ Nai hau halo sala ona no halo ona hahalok aat kontra Ita-boot iha Ita-boot Nia presence (Salmu 51:4).
Ajuda sira hodi simu responsabilidade bainhira sira monu ba sala, mesmu iha barak mos monu ona problema ou sala hanesan, maibe ita sei iha responsabilidade ba Maromak.

Ajuda sira para hodi arepende. Arepende mos lori laran triste tamba ita halo sala ona, no arepende hodi husik hela sala tomak nebe ita halo, no ita komesa muda ba diresaun nebee ke foun. Ita mos ajuda sira hodi fiar aan restora fali sira nia fiar, ajuda hadia fali relasaun nebe ke aat ona,se karik bele ita mos selu saida maka ita nia kolega nee halo. No ita mos ajuda sira hodi iha forsa no metin hodi sira bele liu susar ida nee.

Liu husi falha nune Maromak hanorin ita ho lisaun nebe kee hanesan para ita labele repete iha futuru. Ita bele ajuda sira hodi sira responde Maromak nia koreksaun ba sira i sira mos hodi agradese ba Maromak. Ida nee la fasil maibe ita komprende Maromak nia objetivu bainhira ita hasoru disiplina nee para ajuda lori fali ita ba santidade (Ebreu 12:10) sira komesa fo obrigadu ba Aman iha lalehan nebe fo koreksaun ho domin. Maromak mos fo protesaun ba sira nebe hetan disiplina karik sira nia fuan kanek nune Maromak sei fo kura ba sira. (RG)

Hahan ba klamar: Atus 8 – 9, Lucas 8:26 – 39, Salmu 146, Proverbius 16:4 – 5